جمعه ۲۹ دی ۱۳۹۶ -

Qashqai Online

شعر طنز ترکی "استاد" از آرمان فرهنگ

  • شناسه خبر : 1573
  • دسته بندی خبر : شعر

 هم علي يي،هم ولي يي
چاغيريرلار،استاد،استاد!
منيم شيكيللي دلي يي
چاغيريرلار استاد،استاد!

 من كي استاد،اولمام  آما

گؤرديم سحر دن آخشاما

واتساپ ده، يازيرلار ناما

چاغيريرلر استاد،استاد

 

ياددان چيخيب، ايل عشاقي

اوخارودان ، تا آششاقي

باشي چيخن ،هر  اوششاقي

چاغيريرلار،استاد استاد

 

گور نه تير و، تفنگ ائدير

شعري چكيب ،جفنگ ائدير

سرباز پيش فنگ -پا فنگ ائدير

چاغيريرلار،استاد استاد

 

استاد گؤتير..ميش بازاري

حراج كيلو، بير هزاري

 سينه ورم،هر آززاري

چاغيريرلر،استاد استاد

 

قريشميشگ، پوپوليسمه

نمره وئرره گ،توپوليسمه

چاخان يازانگ ،كوپوليسمه

چاغيريرلر استاد،استاد

 

بو جيغله ،گؤر هاردايميش!

كاباره ده ،يا باردايميش؟

ديسكولاردا،شيش-چار دايميش

چاغيريرلر استاد استاد

 

ادب يوخي،هـئچ!مايادان!

اؤره گ كوررا، دور وايادان

ديل اؤرگنميش،پئس دايادان

چاغيريرلر استاد استاد

 

تززه گ! اولموش،عنبر نسا

قيزيرالي،ايسته ر قوسا

استامبول دن  بير قيل يوسا

چاغيريرلر،استاد استاد

 

هر بستني، يالاياني

 يا باشوني ،بولاياتي

بغيراني  ،  اولاياني

چاغيرلار استاد،استاد

 

تاززا بيللير،ساز آلموشدور

دولايي دا،بير چالموش دور

داد اي-داد اي،ده قالموشدور

چاغيريرلار ،استاد،استاد

 

نه قرت بيلير،نه زرت بيلير

نه نت اينن،كنسرت بيلير

بيرپارا چرت و پرت بيلير

چاغيريرلر،استاد استاد

 

دوو من دوو ليگ،شهرت ايچي

آچولموش هر ،بزمه قيچي

منيم تكين،آغزي فيچي

چاغيريرلر،استاد-استاد

 

هر كيم توي دا زينگيللادي

شعر ايچينه،قينگيللادي

يا سه تاري ، جينگيللادي

چاغيريرلر استاد،استاد

 

بيزيم  استاد ترلر ايميز

يئي تر دئيه م،أرلر ايميز!

آرتوق تؤكير،پرلر ايميز

چاغيريرلر استاد استاد

 

چوخ سويوز دور،آد و سانا

مهلت  وئرمه ز،هئچ جوانا

اؤزيني آتير هر يانا

چاغيريرلار استاد استاد

 

آدي قوناغ لوقا چاتير

اؤزيني ايله ري آتير

هنري چوخ ،ارزان ساتير

چاغيريرلار استاد استاد

 

دوربين قرشيسينه تورير

 سيگاروني ،محكم سؤرير

گلين باشي ،شاپاك وورير

چاغيريرلر استاد استاد

 

هر يئرده بير ،جشنواره دير

بئش-اون دانا،ماه پاره دير

ائله  اوردا  ، آواره دير

چاغيريرلر استاد،استاد

 

واري توي دا،واري ياس ده

قفل ائدميشدير ، ايككي قس ده

هيق و كيپ واري دور سس ده

چاغيريرلر استاد استاد

 

اؤزيني چوخ استاد بيلير

استاد دئيه دن ده ويل گولير

رقيب گؤرسه، قاررون ديلير

چاغيريرلر استاد استاد

 

قريشميشدير، ناز و تؤزا

هئچ كس اينن، گئدمه ز سازا

ايندي هر كيم ،كتاب يازا

چاغيرير لار استاد استاد

 

بير تاجيككي، شعري بولوب

تركي ائديب ،شاعر اولوب

موبايل لاردا ،فيلمي دولوب

چاغيريرلار استاد استاد

 

بئيه نه ايش، گؤريب بيزه؟

بير شعر دئميش،قره  قيزه!

چون كي آرتوق،چيخميش اؤزه

چاغيرير لار استاد استاد

 

نئچچه بويوگ،فستيوالدا

مقاله سي،قيل قالدا؟

من بيلميره م،خلق نه حالدا؟

چاغيريرلر،استاد استاد!!!

 

استاد تيتيره دي گؤردا

دئدي نه كول ،سوورام بوردا؟!

نچون هر لوتي يي اوردا؟

چاغيرير لر استاد،استاد

 

حافظ هاردا، ايندي گؤره

كي يئريندن، بيتيب  شورا

نه شاگرد دير،نه ده  غورا

چاغيريرلار استاد- استاد

 

بلبل سسلي، شجريان

ديق ائدميش و جيگري قان!

 نچون قازي،اخر زامان؟؟

چاغيريرلر استاد،استاد

 

سئيره م دئيه م كه قشقايي

چوخ آز گؤره ر" فرود "تايي

سواد يوخي "امين" پايي

چاغيريرلار استاد استاد

 

واردور نئچچه، نفر داهي

قئلن واري، استاد جاهي!

قالوغي ناحق  واللاهي

چاغيريرلر استاد استاد

 

استادينگ چوخ معني واري

أل گؤتيرينگ،سيزي تاري

هر كيم قاچير، شعره ساري

چاغيريرلر،استاد استاد

 

تملق دور ،يا احترام

داهي بسدير،ائده گ تمام!

خواص كي يو،بلكه عوام

چاغيريرلار،استاد استاد

 

داهي استاد،دئمه يينگ سيز

قؤيماز آرتوق،اؤرگنه گ  بيز!

ويل،ائديره گ اؤككيز-اؤككيز

چاغيريرلر استاد استاد

 

استاد اولانلارينگ چوخي

منيم اينن آرا يوخي

ايندي اتل -متل اوخي

چاغيريرلر استاد استاد

 

"آرمانا"باخ و سؤزينه!

پئس قربان اولدي گؤزينه!

هركيم كي آلدي اؤزينه

چاغيرير استاد استاد!

 

آرمان فرهنگ٩٥/٦/١٦

مجموع رتبه (0)

0 از 5 ستاره

نظر خود را اضافه کنید.

ارسال نظر به عنوان مهمان

0
  • مهمان - پرتو

    با سلام خدمت اقای فرهنگ.
    احسنت بر شما بسیار عالی بود.انشااله ادامه میدهید تا فقدان زنده یاد مرحوم تیمور گردانی کمتر احساس شود .البته شاید راه کمی هم سنگلاخ باشد از (داش وپرغ )هم هراس نداشته باشید.